Bağçasaraylı «Hizb ut-Tahrir davasınıñ» mabüsi Enver Mamutovğa «akimiyetni küç ile zapt etüv» qabaatı aydınlatıldı. Bunı advokat Emil Kürbedinov aprelniñ 20-de Facebookta bildirdi.
«Bugün, aprelniñ 20-de, sözde Hizb ut-Tahrir davasınıñ Bağçasaray dörtlüsinden birisi Enver Mamutovğa Cinaiy kodeksniñ 278-inci maddesi boyunca yañı qabaatı aydınlatıldı – Rusiyede akimiyetni küçnen zapt etüv ve Anayasa qurumınıñ deñiştirilmesi! Bu davanıñ bütün qabaatları aynı olacaq!», – dep yazdı o.
Aprelniñ 9-da Qırımdaki mahkeme Bağçasaraylı «Hizb ut-Tahrir davasınıñ» mabüslerine apis müddetlerini bir ayğa uzatqan edi.
Mahkeme qapalı şekilde keçirilgeni ve advokatlardan ğayrı kimse kirsetilmegeni haber etilgen edi.
Keçken sene mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
