Kreml kontrol etken işğal etilgen Qırımnıñ Yuqarı mahkemesi aprel 19-da Qırımtatar Milliy Meclisiniñ reis muavini Ahtem Çiygozğa qarşı cinaiy iş çerçivesinde şaat Yekaterina Mamutovanı sorğuğa çekti.
Qırım.Aqiqat mühbiri bildirgenine köre, o, 2014 senesi fevral 26-da Ukrainağa ve Rusiyege qoltutqan miting iştirakçileriniñ çatışmaları vaqtında Çiygoznı körgenini ayttı. Çiygoz insanlarnı tınçlandırıp, farqlı fikirde olğanlarnı bir-birinden çetleştirmege tırıştı. Mamutovanıñ aytqanına köre, o, bunı yahşı hatırlay, çünki eki gruppa arasında turmaq içün cesaret kerek olğanını tüşünip tura edi. Şaatnıñ qayd etkenine köre, Rusiyege qoltutqan miting iştirakçileri raqiplerini Qırım parlamentiniñ içki azbarından çetleştirmege başlağanda vaqia yerini militsiya hadimleri terk etti. Olarnı o, vaqialarnıñ soñuna qadar körmedi.
Teneffüsten soñ Çiygoznıñ imayesi ceza deñiştirilmesinen bağlı daa bir muracaat berecegini aydınlattı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
