Qırım yarımadasında aprel 19 künü ava şaraitleri birden fenalaştı: yel kğçlendi, bazı yerlerde qar yağdı. Bunı Qırım.Aqiqat muhbiri bildire.
«Pek suvuq oldı, yel ese ve endi çiçeklegen tereklerge qar yağa. Vişneler, armut ve erikler o qadar güzel çiçeklengen edi, amma şimdi meyvalarnıñ bereketini qasevet etemiz», – dey Qarasuvbazarlı bir qadın.
Rusiyeniñ gidrometeorologiya merkezi, Qırımda ava bozulacağını tahmin ete edi. Suvuq yellerniñ kelecegi beklenile edi.
Rusiyeniñ gidrometeorologiya merkeziniñ Qırımdaki reberi Tatyana Lübetskaya: «Cumaaqşamı künü cenübiy tsiklon kelecegi sebebinden ava birden qızacaq, yağanaqlar olmaycaqtır, kündüz +18 derece olacaqtır, lâkin cuma künü tsiklonnen beraber şiddetli yağmurlar yağacaqtır, dağlarda kene suvlı qar yağar. Raatlıq kğnlerinde de ava tüzelmeycek: bazen yaqmuq yağacaqtır, gece ayaz olacaq, kündüz de suvuq – +11 qadar olacağı beklenile», – dep haber etti.
Bundan evel aprel 19 künü, Qara deñizde 12 adamlıq eyyet ile yaldağan «Geroyi Arsenela» gemisi radarlardan ğayıp olğanı haber etilgen edi. Şimdige qadar gemini qıdıralar. O 19 aprelde saat 03.54, sailden 14 deñiz milâ uzaqlıqta olğanda, SOS signalını berdi. Müessiseniñ malümatına köre, gemide 9 ukrainli, 2 rus ve 1 gürci buluna edi.
FVN bergen malümatqa köre, avanıñ fenalaşqanı qıdıruv işlerini mürekkepleştire – cenübiy-ğarbi taraftan saniyede 20 metr suratınen yel ese, deñiz dalğaları 4 baağa qadar köterile.
