Link açıqlığı

Saatnıñ esas haberi

«Çiygoz davasınıñ» mahkemesinde Qırım Haber komitetiniñ sabıq reisi sorğuğa çekile


Kreml kontrol etken Qırım Yuqarı mahkemesi Qırımtatar Milliy Meclisiniñ reis muavini Ahtem Çiygoznıñ cinaiy işi çerçivesinde keçirgen daa bir oturışında Qırım Muhtar Cumhuriyeti Haber komitetiniñ sabıq reisi Şevket Memetovnı sorğuğa çeke. Bunı Qırım.Aqiqat mühbiri bildire.

Bergen malümatına köre, 2014 senesi fevral 26-da olğan eki miting iştirakçileri saba saat 9-da toplaşmağa başladı. Tahminen saat 11-lerde eki taraf da barışıqsever yanaştı, bazıları özara laf ete ediler. Rusiyege qoltutqan bir gruppa kelgen soñ vaziyet istilâğa deñişti.

Memetovnıñ bildirgenine köre, Aqyar ve Bağçasaraydan 10 avtobus kelgen edi. Mitingden soñ Rusiyege qoltutqanlar olarğa minip kett. Bundan ğayrı, Memetov çatışmalarğa yol bermemek içün bir şey yapmağan militsiya hadimleriniñ areketsizligini qayd etti.

Aprel 13-de «Çiygoz davasınıñ» oturışında Kreml kontrol etken Qırım Yuqarı mahkemesi Qırımtatar Milliy Meclisiniñ reis muavini İlmi Ümerovnı sorğuğa çekken edi.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.


XS
SM
MD
LG