Link açıqlığı

Bağçasaraydaki tintüvler vaqtında tutulğanlarnıñ birisini evge yiberdiler – faaller


Eskender Memetov

Aprel 13-de Bağçasaraydaki tintüvler vaqtında tutulğan qırımtatarlarınıñ birisi Eskender Memetov aprel 15-de evge yiberildi. Bunı Qırım faali Mümine Saliyeva Facebookta haber etti.

«Eskender Memetovnıñ memuriy apis cezası soñuna keldi. Aqmescitteki Pavlenko soqağında olğan memuriy yaqalanğanlar tutulğan binadan çıqtı», – dep yazdı Saliyeva.

Aprel 13-de Kreml kontrol etken Bağçasaray rayon mahkemesi qırımtatarlarnıñ evlerinde keçirilgen saba tintüvlerinden soñ yaqalanğanlarğa qarşı ükümlerni çıqardı. Eskender Memetov 2 künge memuriy apiske alındı.

19 yaşında Eskender Memetov – 2016 senesi mayıstan berli SİZOda yatqan «Bağçasaray musulmanları davasınıñ» mabüsi Remzi Memetovnıñ oğludır.

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler.

Rusiye uquq qoruyıcıları tintüv ve tutuvlarnı «planlaştırılğan tedbirler» dep adlandırdı.

Ukraina Tışqı işler nazirligi halqara toplulıqqa muracaat etip, Rusiyege qarşı basqını quvetleştirmege rica etecegini bildirdi.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG