Link açıqlığı

Bağçasaraydaki tintüvlerniñ şaatı Mustafayev 10 künge apiske alındı – faal


Kreml kontrol etken Bağçasaray rayon mahkemesi Seydamet Mustafayevni Seyran Saliyevniñ evinde keçirilgen tintüv vaqtında «qanunsız mitingde» iştirak etmesinden sebep 10 künge apiske almağa qarar çıqardı. Bunı Qırım faali Mümine Saliyeva aprel 14-de Facebookta bildirdi.

«Seydamet Mustafayevniñ mahkeme oturışı yekünlendi. Bugün onıñ ekinci memuriy cinayeti baqıldı – mahkeme onı Seyran Saliyevniñ evinde keçirilgen tintüv vaqtında qanunsız mitingde iştirak etmesinde qabaatlay. Mahkeme Rusiye Memuriy cinayetler kodeksiniñ 20.2 maddesi 6-ncı qısmına köre üküm çıqardı – 5 künlik memuriy apis cezası. 13.04.2017 tarihinde Rusiye Memuriy cinayetler kodeksiniñ 20.3 maddesine köre çıqarılğan qararına binaen, Mustafayev 10 künlik apis cezasına alınğan edi, böylece Seydamet Mustafayevge nisbeten soñki qarar çıqarıldı – 13.04.2017 tarihinden 10 künlik memuriy apis cezası», – dep yazdı o.

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler.

Tintüvler neticesinde Rusiye uquq qoruyıcıları yedi qırımtatarını tuttı. Olarğa qarşı memuriy protokollar tizip, olarnı mahkemege yolladılar.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG