Link açıqlığı

«Hizb ut-Tahrir davasınıñ» mabüsi Zeytullayevniñ mahkemesi taraflarnıñ muzakerelerine başlay – advokat


Qırımlı Ruslan Zeytullayevniñ davasını baqqan Rusiyeniñ Rostov-na-Donu şeerindeki Şimal-Kavkaz bölge arbiy mahkemesi aprel 21-de taraflarnıñ muzakerelerine keçe. Bunı Zeytullayevniñ advokatı Emil Kürbedinov Facebookta bildirip, «ükümge de az qaldı», dep qayd etti.

O, aprel 14-de olıp keçken mahkeme oturışını da tarif etti.

Onıñ aytqanına köre, Ruslan Zeytullayev mahkemede malümat berdi. Mahkeme imayeniñ bir sıra muracaatını red etip, cinaiy işniñ bir sıra malümatını da seslendirmege razı olmadı.

«Gizli şaat «Aleksandr» mahkemege ketirilmedi – Qırım sıñır hızmetiniñ gizli vesiqasına esaslandırlar – uzaqqa ketip, qaytacağını vade etmedi dep. Ruslannen beraber «Aleksandr» sorğusı protokolınıñ seslendirilmesine qarşı çıqtıq», – dep yazdı Kürbedinov.

Advokat dedi ki, Zeytullayevniñ küçü olmasa da, o, aprel 4-de ilân etken açlığına devam ete.

Aprel 14-de Rostov-na-Donu şeerindeki Şimal-Kavkaz bölge arbiy mahkemesine «Hizb ut-Tahrir davasınıñ» mabüsi Ruslan Zeytullayevge acele yardım çağırıldı. Advokat Emil Kürbedinovnıñ bildirgenine köre, Ruslan Zeytullayev 10 kün açlıq tutıp, 6 kilogramm azdı ve ayaqta turıp laf etip olamay.

Ruslan Zeytullayev aprel 4-de Rostov-na-Donu şeerinde Şimal-Kavkaz bölge arbiy mahkemesiniñ toplaşuvında müddetsiz açlıq tutacağını ilân etti. O, Rusiye tarafına bir sıra talapbını seslendirdi: qırımtatarlarnı «terrorizm» ve «ekstremizm» maddeleri boyunca taqip etmemek, Ukraina TİN temsilcilerini oña muvaqqat apiske yibermege ve Aqyarlı «Hizb ut-Tahrir davasınıñ» başqa mabüslerini azat etmege talap etti.

Rostov-na-Donu şeerindeki Şimal-Kavkaz bölge arbiy mahkemesi, 2016 senesi sentâbr 7 künü Zeytullayevni «terroristik cemiyette iştirak etkeninde» qabaatlı tanıdı ve oña 7 yıl apis cezasını berdi. Rusiye prokuraturası Rusiye Aliy mahkemeniñ bu qararına itiraz bildirdi ve dava, tekrar baqılmaq içün, kene de Şimal-Kavkaz bölge arbiy mahkemesine yollanıldı. Taqiqat organları, Zeytullayevnıñ terroristik cemiyet iştirakçisi degil de, teşkilâtçı olaraq tanılğanını istey. Rusiye Cinaiy Kodeksiniñ böyle maddesi, eñ azından 15 yıl ve atta ömürlik apis cezasına ketirmek mümkün.


XS
SM
MD
LG