Link açıqlığı

Kyivde qırımtatar şairi Şakir Selimniñ doğğan künü qayd etilecek


Kyivde aprel 15-de, cumaertesi künü, qırımtatar şairi, terciman ve publitsist Şakir Selimniñ doğğanından 75 yıllığı munasebetinen edebiyat aqşamı keçirilecek.

Aqşam teşkilâtçılarınıñ bildirgenine köre, tedbir çerçivesinde müellifniñ eserleri taqdim etilecek, şairniñ yaşayışı ve edebiy faaliyetini añlatqan film numayış etilecek, genç qırımtatar yazıcıları, tarihçılar, Ukraina halq deputatları ve Qırımtatar Milliy Meclisiniñ vekilleri çıqışta bulunacaq.

Tedbir saat 14:00-16:00 Ukraina Milliy parlament kütüphanesinde olacaqtır.

Teşkilâtçıları «Qırım ailesi» cemaat teşkilâtı, Qırımtatar Milliy Meclisi ve ATR telekanalı olalar.

Şakir Selim (1942 – 2008) – qırımtatar şairi, terciman, publitsist. Bir qaç şiiriyet cıyıntığı, klassik eserlerniñ qırımtatar tiline tercimeleriniñ müellifidir. Olarnıñ arasında Adam Mitskeviçniñ «Krımskiye sonetı», Aleksandr Puşkinniñ «Kavkazskiy plennik» ve «Malenkiye tragedii», Taras Şevçenkonıñ «Katerina», Aleksandr Tvardovskiyniñ «Po pravu pamâti», Mustay Karimniñ «V noç lunnogo zatmeniya», Mihail Lermontovnıñ şiirleri bar. Qırımtatar drama teatrinde onıñ tercime etken sanalaştırmaları oldı. Olarnıñ arasında – Nikolay Gogolniñ «Jenitba», William Shakespeareniñ «Makbet» eserleri. Şakir Selim ömrüniñ 45 yılını icadiy faaliyetine bağışladı.

XS
SM
MD
LG