Rusiyedeki Rostov-na-Donu şeerinde Şimal-Kavkaz bölge arbiy mahkemesinde, aprel 4 künü müddetsiz açlıq tutacağını ilân etken «Hizb ut-Tahrir davasınıñ» mabüsi Ruslan Zeytullayevke acele yardım çağırıldı. Bunı Facebookta Qırımlı advokat Emil Kurbedinov yazdı.
Bundan evel advokat, açlıqnıñ 10 künü devamında Ruslan Zeytullayev 6 kiloğa azğanı ve turıp laf etip olamağanını bildirdi.
Ruslan Zeytullayev, aprel 4 künü Rostov-na-Donu şeerinde, Şimal-Kavkaz bölge arbiy mahkemesiniñ toplaşuvında, müddetsiz açlıq tutacağını ilân etti. O Rus tarafına bir sıra talaplarını seslendirdi: qırımtatarlarnı «terrorizm» ve «ekstremizm» maddeleri boyuncataqip etmemege, Ukraina TİN temsilcilerini oña muvaqqat apiske yibermege, ve Aqyarlı «Hizb ut-Tahrir davasınıñ» başqa mabuslarını azat etmege talap etti.
Rostov-na-Donu şeerindeki Şimal-Kavkaz bölge arbiy mahkemesi, 2016 senesi sentâbr 7 künü Zeytullayevni «terroristik cemiyette iştirak etkeninde» qabaatlı tanıdı ve oña 7 yıl apis cezasını berdi. Rusiye prokuraturası Rusiye Aliy mahkemeniñ bu qararına itiraz bildirdi ve dava, tekrar baqılmaq içün, kene de Şimal-Kavkaz bölge arbiy mahkemesine yollanıldı. Taqiqat organları, Zeytullayevnıñ terroristik cemiyet iştirakçisi degil de, teşkilâtçı olaraq tanılğanını istey. Rusiye Cinaiy Kodeksiniñ böyle maddesi, eñ azından 15 yıl ve atta ömürlik apis cezasına ketirmek mümkün.
