Link açıqlığı

Çubarov: Qırımdaki zorbalıqqa qarşı küreşmek içün Rusiyege qarşı sanktsiyalar quvetleştirilmeli


Refat Çubarov, arhiv fotoresimi

Qırımdaki zorbalıq seviyesini eksiltmek içün Rusiyege qarşı sanktsiyalarnı quvetleştirmek kerek. Bunı Qırımtatar Milliy Meclisiniñ reisi Refat Çubarov aprel 13-de Qırım.Aqiqatqa bildirdi.

«Rusiyege halqara basqı yapma semereli mehanizmleri tapılğanına qadar böyle devam etecek. Rusiyeniñ işğal etilgen Qırımda yapqanları içün alğan cezaları insanlarğa qarşı zorbalıqnı eksiltmek içün yeterli degil. Şimdi sanktsiyalar quvetleştirilmeli», – dep qayd etti Çubarov.

Onıñ fikirince, «olğan çağıruv, deklaratsiya ve qararlarn devam ettirip qayd etmek kerek, Birleşken Milletlerniñ Halqara mahkemesinde davalaşmağa devam etmeli».

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler.

Advokat Cemil Temişevniñ aytqanına köre, yaqalanğan Qırım musulmanlarına qarşı memuriy protokollar tizildi, olarnı mahkemege alıp keteler.

Aprel 6-da OMON hadimleri Aqmescitniñ merkeziy bazarını sarıp alğan edi. Rusiye uquq qoruyıcıları «slavân körünişi olmağan» 80-ge yaqın insannı tuttı. Qırımdaki Rusiye politsiyasınıñ idaresi Aqmescit çarşısındaki tutuvlarnı «planlaştırılğan iş tedbirleri» dep adlandırdı.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.


XS
SM
MD
LG