Link açıqlığı

Devlet sıñırında Qırımğa ruhsetsiz kirgen maşna saibine 17 biñ grivna para cezası berildi


Tasviriy fotoresim

Keçende, aprel 12 künü Ukraina Devlet sıñır hızmetiniñ hadimleri «Çaplınka» kiriş-çıqış kontrol noqtasında işğal olunğan Qırımğa ruhsetsiz kirgen maşna saibini cezaladılar. Bu aqta Herson VDM sitesinde, Ukraina Devlet sıñır müessisesine atıf etip, haber berile.

«Çaplınka» kiriş-çıqış kontrol noqtasında «VAZ» maşnasında eki Ukraina vatandaşı keldi, olar yarımadadan Hersonğa yol tuta ediler. Naqliyat baqılğanda sıñırcılar, Devlet Maliye hızmetiniñ vekillerinen beraber bu vatandaşlar vaqıtınce işini toqtatqan «Keriç» kiriş noqtasından işğal olunğan Qırımğa ruhsetsiz barğanlarını belgilediler», – dep haber etile.

Müessisede haber etkenleri kibi, erkeklerni vaqıtınce işğal olunğan Qırımğa kiriş qaidelerni bozğanları içün MUB UK 204-2 maddege köre memuriy mesuliyetke celp ettiler, Devler Maliye hızmetiniñ vekilleri ise Ukraina sıñır qanunlarınıñ 477 maddesini bozğanları içün 17 biñ grivna para cezasını berdi.

Qırım 2014 senesiniñ başında Rusiye tarafından işğal etilgen soñ Ukainanıñ qıtaiy qısımı ve yarımda arasında asılında memuriy, lâkin fakt olaraq kerçek «sıñır» keçirildi. Memuriy sıñırda «Kalançak», «Çongar» ve «Çaplınka» kiriş-çıqış kontrol noqtaları çalışmaqta.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG