Link açıqlığı

Rusiyeli milliarder Alişer Usmanov, muhalifetçi Aleksey Navalnıy ve onıñ tesis etkeni «Qabarcılıqqa qarşı küreş Fondınen» (QQKF) tartışa. Aprel 12 künü aqşam Moskvanıñ Lüblin mahkemesine onıñ şikâyeti keldi. Usmanovnıñ şikâyeti neden ibaret olğanı açıqlanılmay, şikâyet baqılacaq müddet daa belgilenmedi.

Bundan evel Usmanov, oña zarar ketirgen ve adını aqaretlegen dercler sebebinden o mahkemege muracaat etecegini bildirgen edi.

Martnıñ başında QQKF Rusiye akimiyetiniñ yolbaşçısı Dmitriy Medvedev qullanğan mülkü aqqında video-taqiqatını derc etti. Taqiqatta ayırıca, Medvedevnen bağlı olğan «İçtimaiy devlet leyhası» fondına Usmanov tarafından 5 milliard ruble fiyatında Rublövka yolundaki ev ve topraq damartısı bahşış etilgeni aytıla. İş adamı, çiftlikni teñ qıymetli añlaşma şartlarında bergenini dey. QQKF ise qabar berilgeni aqqında vesiqaları bar olğanını ve mahkemege deliler bereceklerini beyan ete.

Bundan evel Aleksey Navalnıy, adını ve namusını qorçalanmağa istegen Usmanovnıñ şikâyeti sebebinden uquq qoruyıcı organlar tarafından QQKF-ğa ve siyasetçiniñ özüne basqı yapılmaq mümkün olğanını aytqan edi.

XS
SM
MD
LG