Link açıqlığı

Saatnıñ esas haberi

Rusiye Devlet Duması prezident saylâvlarını Qırım işğaliniñ yıllığında keçirilmesine qol tuttı


Rusiye Devlet Duması
Rusiye Devlet Duması

Rusiyede prezident saylâvlarını 2018 senesi mart 11 kününden mart 18 kününe keçirmege azırlanalar, bu künü Rusiyede Qırım işğaliniñ yıllığı qayd etilecek. Aprel 12 künü Rusiye Devlet Duması parlamentniñ aşağı palatasında kerekli üç rey berüvnden birincisinde künniñ deniştirilmesine qol tuttı. Qarar umumen qabul etilecegi beklenile.

Rusiye qanunlarına binaen, prezident saylâvları martnıñ ekinci bazar kününde keçirilmeli, eger de bu – iş kününe rast kelse, rey berüvi bir afta ögüne ötkerile.

Qanun leyhasınıñ muellifleri, Halqara qadınlar künü 8 martta qayd etilgen soñ, mart 11 iş künü olacağını tahmin eteler. Amma rey berüvni bir afta ögüne keçirmek yerine, olar bir aftadan soñ mart 18 künü keçirmege teklif eteler.

Nezaretçiler, 2014 senesi Rusiyede «Qırımnıñ qoşulması» aqqında añlaşma imzalanğan künde saylavlarnıñ keçirilmesi Vladimir Putinniñ namzetine çoqça rey berilmesine sebep olacağını tüşüneler.

1999 senesinden berli preziden ya da baş nazir vazifesinde üküm etken Vladimir Putin, daa bir kere altı yıllıq müddetke prezident vazifesine öz namzetini daa çıqarmadı, amma bunı yapacağı beklenile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG