Link açıqlığı

Rusiye uquq qoruycıları Qırımdaki tutuvlarnı «planlaştırılğan tedbirler» dep adlandırdı


Kreml kontrol etken Rusiye İçki işler nazirliginiñ Qırım idaresi Rusiyede yasaq etilgen teşkilât iştirakçileriniñ yaqalanmasınen bağlı «planlaştırılğan tedbirler» aqqında haber ete. Bunı aprel 13-de saba Bağçasarayda olıp keçken tintüv ve tutuvlardan soñ idareniñ matbuat hızmeti bildire.

«Qırım Cumhuriyetindeki İçki işler nazirliginiñ hadimleri Bağçasaray rayonındaki uquq qoruyıcı hızmetleri ile iş tutıp, Rusiyede yasaq etilgen teşkilâtnıñ faaliyetinen bağlı olğan şahıslarnı tapmaq ve yaqalamaq maqsadınen planlaştırılğan tedbirler keçirmekte. Ekstremist yönelişinde edebiyat tutıp alına», – dep aytıla haberde.

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler.

Advokat Cemil Temişevniñ aytqanına köre, yaqalanğan Qırım musulmanlarına qarşı memuriy protokollar tizildi, olarnı mahkemege alıp keteler.

Aprel 6-da OMON hadimleri Aqmescitniñ merkeziy bazarını sarıp alğan edi. Rusiye uquq qoruyıcıları «slavân körünişi olmağan» 80-ge yaqın insannı tuttı. Qırımdaki Rusiye politsiyasınıñ idaresi Aqmescit çarşısındaki tutuvlarnı «planlaştırılğan iş tedbirleri» dep adlandırdı.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.


XS
SM
MD
LG