Evinde tintüv keçirilgen Seydamet Mustafayevge qoltutmağa kelip Rusiye uquq qoruyıcıları tarafından urulğan qırımtatarını acele yardım alıp ketti. Bunı jurnalist Şevket Namatullayev Facebookta bildirdi.
«Tayaqlarnen köteklengen qırımtatarını acele yardım alıp ketti», – dep yazdı Namatullayev.
Haber etilgeni kibi, Rusiye uquq qoruyıcıları bir qırımtatarını tayaqlarnen urğanlar, o, esini coydı. «Kremlniñ Qırım siyasiy mabüsleri» cemiyetiniñ saifesinde qayd etile ki, urulğan kişi fotoressam Seytumer Seytumerov ola.
Rusiye uquq qoruyıcıları tintüv ve tutuvlarnı şimdilik izaatlamadı.
Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçireler.
Aprel 6-da OMON hadimleri Aqmescitniñ merkeziy bazarını sarıp alğan edi. Rusiye uquq qoruyıcıları «slavân körünişi olmağan» 80-ge yaqın insannı tuttı. Qırımdaki Rusiye politsiyasınıñ idaresi Aqmescit çarşısındaki tutuvlarnı «planlaştırılğan iş tedbirleri» dep adlandırdı.
Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
