Bağçasarayda musulman Seydamet Mustafayevniñ evinde keçirilgen tintüv vaqtında Rusiye uquq qoruyıcıları insanlarnı köteklemege ve tutmağa başladı. Ateş açılğanı da eşitildi. Bunı «Qırım birdemligi» birleşmesiniñ faali Server Mustafayev Facebookta yazdı.
Qırımlı Mümine Saliyeva tintüv keçirilgen insanlarğa qoltutmağa kelip tutulğan dört insannıñ adını aydınlattı.
«Suniy şekilde yapılğan provokatsiyalar vaqtında insanlarğa qoltutmağa kelgen Mustafa ve Şevket Abduramanovlar (oğlu ve babası), Eskender Memetov, Remzi Zudiyev yaqalandı», – dep yazdı Saliyeva.
Jurnalist Şevket Namatullayev bildirdi ki, qırımtatarlardan birisini uquq qoruyıcılar kötekledi, o, esini coydı.
