Bağçasarsyda aprel 13 sabası Rus silâlı hızmetleri yerli musulmanlar – Riza Mujdabayev (6-cı qasaba) ve Seydamet Mustafayevniñ (7-ci qasaba) evlerinde tintüvler ötkerile.
Bunı Facebookta Qırımtatar Milliy Qurultayınıñ MSK reisi Zair Smedlâyev haber etti.
Jurnalist Şevket Namatullayev tintüvlerniñ video-levhalarını yayınladı.
Muhbir: «Bağçasarayda qırımtatarlarnıñ sabası kene tintüvlerden başlandı. Rus silâlı hızmetleriniñ hadimleri Seydamet Mustafayev ve Riza Mujdabayevniñ evlerine keldi, olar 6-cı ve 7-ci qasabalarda yaşaylar. Silâlı adamler, böyle erte ziyaretniñ maqsadını qomşularğa añlatmay. Politsiya hadimleri, bese-belli, ballarnı desteklemek maqsadınen adamlar kelmesin dep, yollarnı qapattı. Kelgenlerni ise, polisniñ «qanuniy» talabına riayet etmegenleri içün, tutmaq mümkünler», – dep yazdı.
«Qırım Birdemligi» birleşmesiniñ faali Server Mustafayev Facebookta, tintilgen eviniñ yanında Rosgvardiya maşnasını körgeni aqqında bildirdi.
İçtimaiy site qullanıcısı Timur İbragimov öz Facebook saifesinde adise yüz bergen yerden canlı yayın ötkere.
Rusiye silâlı muessiseleri bu tintüvlerni resmiy izaatlamay.
Aprel 6 künü saba Aqmescitniñ merkeziy bazarını Rusiyeli OMON hadimleri sarıp aldı. Rus silâlı hızmetleri 80-ge yaqın «sıfatından slav olmağan» adam tuttı. Rusiye politsiyasınıñ Qırımdaki idaresi Aqmescitniñ bazarında tutuvlarnı «plandaki iş tedbirleri» olaraq tanıttılar.
Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
