Kezlevde kâinat aletlerni idare etecek kompleksniñ yañı cihazlarını yerleştirmek içün alan azırlana. Bu aqta Facebookta Kreml nezarenitdeki Qırım yolbaşçısı Sergey Aksönov beyan etti.
Aksönov: «Uzaq kâinat bağı merkezinde aletler yañılatıla, Zeminden kâinat aletlerini idare etecek kompleksniñ yañı cihazlarına temel azırlanıla», – dep yazdı.
Aprel 12 künü Ukraina, Rusiye ve evel Sovet Birligine kirgen devletlerde Kosmonavtika Künü qayd etile. Bu bayram adamnıñ kâinatqa birinci uçuşı sebebinden tain etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
