«Tavrida» yolunıñ qurılması içün yarımadanıñ Rus akimiyeti 171 topraq damartısını tutıp alacaq ola. Bu aqta Kremlniñ nezaretinde olğan işğal etilgen Qırımnıñ Mülk ve topraq munasibetleri nazirliginiñ matbuat hızmeti bildire.
Rusiye nezaretindeki Qırım akimiyeti, ayrıca İçki rayonında – 12 topraq damartısını, Kefe şeer bölgesinde – 16, Aqmescit rayonında – 98 topraq damartısı ve 8 temelli qurucılıq inşaatını, İslâm-Terek rayonında – 8, ve Bağçasaray rayonında – 43 topraq damartısını tutıp alacaq ola, dep haber etile.
«Alınacaq topraqnıñ saipleri mülkniñ bazarlıq fiyatına köre onı satıp, bütünley tazminat alacaqlar ya da aynı qıymeti olğan topraq damartısını başqa yerde ala bilirler», – dedi Kreml tarafından tainlengen Qırımnıñ mülk ve topraq munasibetleri naziri Anna Anühina.
Bundan evel Rusiye nezaretindeki Qırımnıñ mülk ve topraq munasibetleri nazirligi, «Tavrida» naqliyat yolunıñ qurucılığı içün topraq damartılarınıñ alınması naqliyat yolu tezce qurulması içün 2-3 ayğa qısqartıldı, dep bildirgen edi.
Fevralde «Tavrida» yolunıñ quracılığınıñ başlanmasını 2017 senesi mart ayına keçirdiler.
Bundan evel Kreml nezaretindeki Qırım parlament deputatı Leonid Babaşev Qırım naqliyat nazirliginiñ toplaşuvında «Tavrida» yolunıñ qurucılığınıñ başlanuvını 2017 senesi fevral ayına planlaştırğanlarını bildirgen edi.
Rusiye baş naziri Dmitriy Medvedev «Tavrida» taqliyat yolunıñ qurucılığına parasını tapmaq içün Rusiye akimiyeti «çoq çalıştı», dep ayttı. «Tavrida» yoluna başta 43 milliard ruble masraf etilecek edi. Soñra leyha başta 85 milliard, keççere – 139 milliard rublege palılaştı. 2018 senesi «Tavrida» yolu azır olacağı ilân etilgen edi. Lâkin iyünde Rusiyege bağlı Qırım avtomobil yollar hızmetiniñ yolbaşçısı Aleksandr Mohna qurucılıq müddeti daha eki yılğa ögge sürülecegini degen edi.
