Qırımda işğalden soñ tiklengen «yarı aydut totalitar rejimi bazı alâmetlerine köre sovetlerden beter oldı». Bunı qırımtatar halqınıñ lideri Mustafa Cemilev bu künleri Slovakiyanıñ paytahtı Bratislavada dünyada zıddiyet ve zorbalıq meselelerine bağışlanıp keçirilgen konferentsiya vaqtında ayttı.
«Qırımtatarlarnıñ küreşi uzun ve israrlı oldı, lâkin neticede muvafaqiyetli oldı. Yüzlernen insan apishane ve lagerlerden keçti, bazıları apishane divarlarında can berdi. Vatanğa qaytmaq içün küreşken bir çoq insan onı öyle de körip olamayıp, ğurbette defn etilgen edi», – dep qayd etti o.
Amma, Cemilevniñ aytqanına köre, qırımtatarlar başqasınıñ bir tamçı qanını tökmeyip, vatanlarına qayttı.
«Yarım asırlıq sürgünlikten soñ vatanına qaytqan halq, repressiyalarnıñ basqısı altında Qırımnı kene terk etmege ve esas Ukrainada yerleşmege mecbur qaldı», – dep yekünledi o.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
