Link açıqlığı

Polozov mahkemecilerniñ «Çiygoz davasındaki» areketlerinden şikâyet arizasını bermek niyetinde


Nikolay Polozov

Rusiyeli advokat Nikolay Polozov Qırımtatar Milliy Meclisiniñ reis muavini Ahtem Çiygoznıñ davasını baqqan mahkemecilerniñ yapqan areketlerinden şikâyet arizasını berecek ola. Bunı Polozov aprel 5-de Qırım.Aqiqatqa tarif etti.

«Maña qarşı Moskvanıñ advokatlar palatasına şahsiy qarar çıqarıldı, distsiplin soruştırma yapacaq olalar. Bu mahkemecilerniñ areketlerinden Yuqarı mahkemeciler kollegiyasına şikâyet arizası berilecek, çünki cinaiy esnasnı bu şekilde baqmaq – mahkemeniñ özüne qarşı sayğısızlığıdır», – dep qayd etti Polozov.

Advokatnıñ bildirgenine köre, mahkemecilerniñ davanı baqmağa azır olmağanları körüne edi.

«Ahtem Çiygoz davasınıñ diger mahkeme oturışlarında mahkemeciler mahkeme esnası kete kibi köstermege tırışa: delillerni baqa ve ilâhre. Mında kimse oyun oynamadı, bizni doğru esnastan çıqardılar», – dep qoştı Polozov.

Haber etilgeni kibi, aprel 5-de Kreml kontrol etken Qırım Yuqarı mahkemesi Qırımtatar Milliy Meclisiniñ reis muavini Ahtem Çiygoznıñ apis müddetini uzatma qararı baqılğanda mahkeme maznunnı ve advokatı Nikolay Polozovnı nizamnı bozğanları içün «çıqarmağa» qarar alıp, Çiygoz ve Polozov mahkeme oturışında iştirak etken yayınnı söndürdiler.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG