Kreml kontrol etken Aqmescitniñ Jeleznodorojnıy rayon mahkemesinde aprel 3-de olıp keçken oturışında Nikolay Semena er bir jurnalist Qırım statusınen bağlı fikirini ayta ve dünya toplulığında bu mevzu üzerinde keçirilgen munaqaşalarda iştirak ete bile, dep ayttı. Bunı Semena Qırım.Aqiqatqa tarif etti.
Onıñ aytqanına köre, mahkeme oturışındı qabaatta olğan maqaleniñ müellifine diqqat etildi, jurnalist 2016 senesi aprel 19-da olğan sorğuda onıñ müellifi olğanını tanıdı, bunı endi isbatladılar.
«Meni taqip etken FSB taqiqatçıları bugün sorğuğa çekildi. Eñ çoq diqqat bu maqaleniñ müellifi olğanıma ayırıldı, lâkin men bunı iç bir vaqıt inkâr etmegen edim. Menim fikirimce, davanıñ ilerideki baqılması daa müim olacaq, çünki bu maqalede bir de bir cinayet yoq, bunı aytacaqmız. Taqiqat vaqtında buña çoq emiyet berilmedi», – dedi Nikolay Semena.
Jurnalistniñ qayd etkenine köre, o, mahkeme oturışında «jurnalistler bu vaziyette fikirini aydınlatma aqqını, söz serbestligi aqqını qullanıp, Qırım statusınen bağlı dünya munaqaşasında iştirak etkenini» isbatlaycaq ola.
«Bugün qabaatqa itiraz bildirip, üç yıldan berli Qırım statusı, eñ az, şübeli bir mesele ola, dep ayttım. Onı dünya muzakere ete, ve er bir jurnalist ya da kütleviy haber vastasınıñ bu munaqaşada iştirak etmek ve fikirini serbest seslendirmek aqqı bar, Ukraina ve Rusiye anayasaları buña izin bere, mında cinayet yoq», – dep qayd etti Nikolay Semena.
Onıñ bildirgenine köre, mahkeme oturışı açıq edi, anda kütleviy haber vastalarınıñ vekilleri bar edi. Olar mahkeme oturışınıñ ses qaydını yaptılar. Aynı vaqıtta, mahkeme Nikolay Semenağa oturışnıñ sesini ve videosını çıqarmağa izin bermedi.
Aprel 3-de Qırımda Qırım jurnalisti Nikolay Semenanıñ davası boyunca mahkeme diñlevleri olıp keçti.
Dekabr 7-de taqiqatçı jurnalist Nikolay Semenağa Rusiye Ceza kodeksiniñ 280.1 maddesiniñ 2-nci qısmındaki «Rusiye Federatsiyasınıñ topraq bütünligini bozacaq areketlerge açıq çağıruv yapması» ile qabaatlanğanını aydınlattı. Taqiqatçı tizgen cinaiy iş 6 cılttan ibaret.
FSB sorğusında Nikolay Semena yazğan işlerinde «fikirini bildirme» aqqını qullandı, dep bildirdi.
Qırımtatar halqınıñ lideri, Ukraina halq deputatı Mustafa Cemilev Nikolay Semenanı «namuslı bir jurnalist» olaraq adlandırıp, onıñ kibi insanlar «işğal etilgen Qırımda basqıncı rejimge razı olmağanını» qayd etti.
Ukraina milliy jurnalistler ittifağınıñ reisi Sergey Tomilenko Semenanıñ mahkeme esnasını «adaletsiz bir mahkeme» dep adlandırıp, onı medeniy bir areket şeklinde kösterece olalar, dep ayttı.
Nikolay Semenanıñ advokatları, Halqara ve Avropa jurnalistleri Federatsiyası, em de OSCE ifade serbestligi meseleleri Temsilcisiniñ ofisi, FSBge muracaat etip, onı Qırımdan tedaviylenmesi içün yibermege çağırdı, lâkin müsbet cevap şimdige qadar daa berilmedi.
Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.
