Kreml kontrol etken Aqmescitniñ Jeleznodorojnıy rayon mahkemesi «Qırım diversantları davasınıñ» mabüsi Redvan Suleymanovnıñ oturışını çarşenbe künü, aprel 12-ne, avuştırdı. Qırım.Aqiqat mühbiriniñ malümatına köre, mahkemeci oturışnı keçirmedi, çünki maznun belli olmağan sebeplerden mahkemege ketirilmedi.
Bu sebepten em imaye, em de qabaat esnasnı devam etmek imkânsız olğanını tüşündiler.
Haber etilgeni kibi, «Qırım diversantları davasınıñ» mabüsi Redvan Suleymanov mahkemede qabaatını tanıdı, amma büyük zarar ketirgeninen bağlı qabaatına razı olmadı.
Kreml kontrol etken Kiyev rayon mahkemesinde «Qırım diversantları davasınıñ» mabüsi Redvan Suleymanovnıñ apis müddeti 2017 senesi mart 20-ne qadar uzatıldı.
«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.
Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.
