Türkiyede aprel 16 künü anayasa referendumı ötkerileceginden bir qaç kün ögüne Kyivde ekspertler rey berüv neticesi ukrain-türk munasibetlerine nasıl tesir etmek mümkün olğanını muzakere etecekler. Qırım.Aqıqat muhbiri, munaqaşada Qırım mevzusı da köterilecegini bildire.
«Ukrainskaya prizma» ve Ukrainada Friedrich Ebert adına fondınıñ temsilciligi tarafından teşkil etilgen «Ukraina – Türkiye işbirliginiñ hususları: qıymetler ve milliy menfaatlar arasında» mevzusında nevbetteki ekspertler munaqaşasınıñ raundında bu aqta söz ketecek.
Ekspertler zamanımızda ukrain-türk dialogını, Türkiyede olacaq referendum ve devletniñ halqara körünüşinde onıñ neticesi, Ankara ve Moskva arasındaki ilân etilgen stratejik işbirligi ve Türkiyeniñ Avropa Birliginen añlaşılmamazlığı terenleşkeni yanında iqtisadiyat ve telükesizlik saasında, Ukraina ve Türkiye arasında serbest ticaret bölgesi boyunca Ukraina ve Türkiye arasında qurulması mümkün olğan işbirlik muzakere etilecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
