Aprel 11 künü Kremlniñ nezaretindeki Aqmescitniñ Merkeziy rayon mahkemesinde «fevral 26 davasınıñ» nevbetteki oturışı keçti. Davanıñ mahkümleri Ali Asanov ve Mustafa Degermenci birinci sefer konvon ile cam qafeste degil de, mahkeme salonında ediler.
Qırım.Aqıqat muhbiri bildire ki, qabaat tarafından tek bir şaat keldi, soy adı – Samonov. Amma, advokatlarnıñ fikirine köre, temelli bir ifade o bermedi. Beş mabustan iç birini o tanımadı, seslendirilgen qabaatlarğa dair iç bir isbaat ketirmedi.
Başqa şaatlar kelmegeni içün, mahkeme deliler baqılmasınıñ tertibini deñiştirmek qararına keldi ve tenefüsten soñ vaqıya yerinden fotoresimlerni baqacaq oldı.
Aprel 6 künü Kremlniñ nezaretindeki Aqmescitniñ Merkeziy rayon mahkemesi «fevral 26 davasınıñ» mahkümleri Ali Asanov ve Mustafa Degermenci içün cezanı deñiştirdi. Olarnı ev apsine yolladılar.
Rusiyeniñ Qırım işğalinden soñ yarımadada 2014 senesi fevral 26-da Ukraina topraq bütünliginiñ tarafdarları mitinginde iştirak etken qırımtatar faallerini mahkeme etmege başladılar. Olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Russkoye yedinstvo» fırqasınıñ faalleri çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
