«UMMA» Ukraina musulmanları diniy idaresiniñ muftisi Said İsmagilov, Rusiye yat parağa leyha yapmağa sevgenini ayta. Onıñ sözlerine köre, bu kibi leyhalardan biri Aqmescitte Cuma-Caminiñ qurucılığı ola. Böyle fikirni İsmagilov Qırım.Aqiqatqa aprel 10 künü seslendirdi.
İsmagilov: «Rusiye yat parağa leyha yapmağa sever. Moskvada tantanalı surette açılğan Cuma-Caminiñ de masraflarınıñ esas qısımını Türkiye ödegen edi. Şimdi Türkiye, bese-belli, Rusiyede bazı leyhalarğa para ayırmay, belki, bu sebepten anda (Qırımda – QA) bazı işler ketmey», – dedi.
O dey ki, Qırımda Cuma-Cami yerli musulmanlar içün pek emiyetli.
«Bu caminiñ qurulacağı içün yıllar devamında küreş alıp barılğan edi. Şimdige qadar Cuma-Cami kibi çalışqan Kebir-Cami – pek ufaq, onda yer yetişmey. Bu sebepten yañı caminiñ qurulması içün büyük bir leyha başlatılğan edi, o musulmanlarnıñ acetlerini qarşılaycaq edi», – dey İsmagilov.
Bundan evel Kremlniñ nezaretinde Qırım akimiyeti, Qırım musulmanlarnıñ esas diniy obyekti olmaq içün qurulğan Cuma-Caminiñ qurucılığı, belgilengen plannı bir ayğa özip keçkenini aytqan edi.
Qırımtatar Milliy Qurultayı Merkeziy saylav komissiyasınıñ yolbaşçısı Zair Smedlâyev, Aqmescitte Cuma-Cami yerinde Qırım müftiyliginiñ memuriy binası qurulğanını beyan etken edi.
Qırımnıñ milletlerara munasebetler ve sürgün olunğan vatandaşlarnıñ işleri boyunca komitetiniñ Rusiye yolbaşçısı Zaur Smirnov temel qoyulğanını bildirdi. Qırımdaki Cuma-Cami qurucılığı 2015 senesi sentâbr 25-de başladı. Kreml kontrol etken yarımada akimiyeti qurucılıq 3 yıl devam etecegini bildirgen edi.
