Rostov-na-Donu şeerinde Rus akimiyeti Ukrain konsullarını «Hizb ut-Tahrir davasınıñ» açlıq ilân etken mabusı Ruslan Zeytullayevke yibermey. Bunı Qırım.Aqiqatqa Uktaina TİN temsilcisi Maryana Betsa heber etti.
O dedi ki: «Ukain tarafınıñ, Ukraina TİN adından ve Rusiyedeki Ukarain elçihanesi adından Rusiye Federatsiyasına yapqan bir-çoq muracaatlarına baqmadan, bügünge qadar bizim konsulımız, Rusiye Federatsiyasında qanunsız tutılğan ve apis etilgen qırımtatarı Ruslan Zeytullayevni ziyaret etmek içün ruhset alıp olamadı».
TİN temsilcisi Rusiye tarafınıñ areketlerini halqara uquqnıñ, hususan Konsullıq munasebetleri aqqında Viyana muqavelesiniñ bozuvı olaraq tanıdı. Bunen beraber, onıñ sözlerine köre, Zeytullayevniñ iştiraginen keçken bütün mahkemelerni ukrain konsulları er sefer ziyaret ete, kendisine ve adliyecilerine destek bermege tırışa.
Bu meselede Rusiye tarafınıñ izaatları yoq.
Ruslan Zeytullayev, aprel 4 künü Rostov-na-Donu şeerinde, Şimal-Kavkaz bölge arbiy mahkemesiniñ toplaşuvında, müddetsiz açlıq tutacağını ilân etti. O Rus tarafına bir sıra talaplarını seslendirdi: qırımtatarlarnı «terrorizm» ve «ekstremizm» maddeleri boyuncataqip etmemege, Ukraina TİN temsilcilerini oña muvaqqat apiske yibermege, ve Aqyarlı «Hizb ut-Tahrir davasınıñ» başqa mabuslarını azat etmege talap etti.
Rostov-na-Donu şeerindeki Şimal-Kavkaz bölge arbiy mahkemesi, 2016 senesi sentâbr 7 künü Zeytullayevni «terroristik cemiyette iştirak etkeninde» qabaatlı tanıdı ve oña 7 yıl apis cezasını berdi. Rusiye prokuraturası Rusiye Aliy mahkemeniñ bu qararına itiraz bildirdi ve dava, tekrar baqılmaq içün, kene de Şimal-Kavkaz bölge arbiy mahkemesine yollanıldı. Taqiqat organları, Zeytullayevnıñ terroristik cemiyet iştirakçisi degil de, teşkilâtçı olaraq tanılğanını istey. Rusiye Cinaiy Kodeksiniñ böyle maddesi, eñ azından 15 yıl ve atta ömürlik apis cezasına ketirmek mümkün.
