Link açıqlığı

Saatnıñ esas haberi

Bağçasaraylı «Hizb ut-Tahrir davasınıñ» mabüslarına apis müddetleri bir ayğa qadar uzatıldı – Kürbedinov


Emil Kürbedinov
Emil Kürbedinov

Qırımdaki mahkeme Bağçasaraylı «Hizb ut-Tahrir davası» mabüslarınıñ apis müddetini bir ayğa qadar uzattı. Bunı Qırım advokat Emil Kürbedinov aprel 9-da Qırım.Aqiqatqa bildirdi.

«Er birine (Bağçasaraylı «Hizb ut-Tahrir davasınıñ» mabüslarına – QA) apis müddetleri bir ayğa qadar uzatıldı. Mahkeme oturışında birden episiniñ işi baqıldı, dörtü qafeste otura edi. Qabaat (esas – QA) Ukrainada bu insanlar siyasiy mabüs olaraq tanılğanına dair malümatnı taqdim etti. Qabaat tarafı dey ki, bu sebepten olarnı azat etmege olmay, çünki Ukraina olarnı öz toprağına avuştırmağa tırışacaq», – dep ayttı Kürbedinov.

Advokatnıñ qoşqanına köre, «üç kün devamında şikâyet arizası berilecek, bundan soñ onı Qırım Yuqarı mahkemesinde baqacaqlar».

Malüm ki, mahkeme qapalı şekilde keçirildi ve advokatlardan ğayrı iç kimse içeri alınmadı.

Keçken sene mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG