Link açıqlığı

Qırım faali ve uquq qorçalayıcısı Suleyman Kadırov ekstremistler cedveline kirsetilgenini haber etti. Onıñ bank kartı da blok etildi. Bunı Kadırov Qırım.Aqiqatqa aprel 3-de aydınlattı.

«Qırım – Ukrainadır» yazğanım içün cinaiy iş açıldı ve buña esaslanıp, meni ekstremistler cedveline kirsettiler. Bank esabım blok etildi, nefaqam anda kele. Bu menim yekâne kârım, bunı yapmağa aqları yoq edi. Çağına yetmegen 10 yaşında qızım, qart anam, qorantada 4 insan ve men şimdi nefaqasız qaldım", – dep ayttı Kadırov.

Onıñ qoşqanına köre, Rusiye akimiyetiniñ bu qararından Avropa mahkemesinde şikâyet etecek.

«İnsannı halqara uquq ve Rusiye anayasası kefil etken nefaqasız nasıl qaldırmaq mümkün? Bu içtimaiy ödevler, onı blok etmege aqları yoq», – dedi Kadırov.

2016 senesi oktâbr 5-de Rusiye uquq qoruyıcıları qırımtatar faali Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv mahkemeci Rodionov İgor İvanoviçniñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.

2016 senesi oktâbr 11-de Suleyman Kadırovğa qarşı separatizm içün cinaiy iş açıldı.

İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

XS
SM
MD
LG