Rusiye şairi Yevgeniy Yevtuşenko 85 yaşında Amerika Qoşma Ştatlarında vefat etti. Bunı Rusiye haber neşirleri şairniñ dostu Mihail Morgulisniñ malümatına esaslanıp bildire.
Yevtuşenkonıñ soñki istegine köre, onı Moskva vilâyetindeki Peredelkino qasabasında defn etecekler.
Yevtuşenko cuma künü, mart 31-de, ağır alda hastahanege alındı.
Şairniñ sağlı problemaları bar edi. 2013 senesi Amerika Qoşma Ştatlarında ayağını qızarıntıdan sebep kesken ediler. Yevtuşenko birden yaramağanı içün icadiy aqşamı keçirilecek Rostov-na-Donu şeerinden alınğan edi. Neticede onı Moskvağa mahsus uçaq ile alıp kettiler. Yanvar başında şair Moskvada icadiy aqşamda çıqışta bulundı.
2015 senesi avgust ayında Yevtuşenko Moskvada kene hastahanege oğradı. Şairniñ yüregi yaramağanından qal pili qoyulğan edi.
Yevtuşenko 1932 senesi iyül 18-de Rusiyeniñ İrkutsk vilâyetiniñ Zima stantsiyasında dünyağa keldi. Yevtuşenkonıñ ilk şiirler kitabı, «Razvedçiki grâduşçego», 1952 senesi dünya yüzüni kördi. O sene SSCB yazıcılar birliginiñ genç azası oldı. 1963 senesi Yevtuşenko İsveç ilimler akademiyasınıñ Nobel edebiyat mukâfatına namzet kösterilgen edi. 1991 senesinden berli şair Amerika Qoşma Ştatlarında yaşap, Rusiyede muntazam sürette çıqışta bulunğan edi.
