Link açıqlığı

Saatnıñ esas haberi

«Asker» Qırım ile memuriy sıñırda nevbetçilik yapmağa devam etmeli – İslâmov


Lenur İslâmov, arhiv fotoresimi
Lenur İslâmov, arhiv fotoresimi

«Asker» vatandaş birleşmesiniñ vekilleri ileride de Qırım ile memuriy sıñırda qalmaq kerekler. Bunı Qırımnıñ vatandaş qamaçavı aktsiyasınıñ koordinatorı Lenur İslâmov aprel 1-de Qırım.Aqiqatqa bildirdi.

«Qırım halqlarınıñ nezaretçileri sıñırda tursa, qırımlılar Ukraina akimiyeti Qırımnıñ subyektligine lâqayt qalmağanından emin olur», – dep qayd etti İslâmov.

Lenur İslâmov Ukraina devlet sıñır hızmetiniñ temsilcileri ile «Asker» yapqan nevbetçilik neticelerini izaatlap, onı göñülliler teşkilâtı olaraq adlandırdı ve «Askerniñ» yardımındın yüzlernen insan faydalanğanını» qayd etti.

«Asker» Qırım «rus» basqıncılarından azat etilgenine qadar memuriy sıñırda qalacaq», – dep qoştı İslâmov.

Berdânsk sıñır otrâdı yolbaşçısınıñ birinci muavini, yarbaylar ştabınıñ yolbaşçısı Sergey Rıbaçenko da «Asker» vekilleri memuriy sıñırda bulunacağını tasdıqladı.

Onıñ aytqanına köre, birleşmeniñ işinden şikâyet etilmegen edi.

Ukraina işğal etilgen topraq ve memleket içinde köçip kelgenlerniñ meseleleri nazirligi Qırım ile memuriy sıñırda kiriş-çıqış nezaret noqtaları donatılmalı, dep bildirgen edi. Memuriy hızmetler merkeziniñ qurulması da közde tutula.

«Asker» vatandaş birleşmesiniñ faalleri mart 28-de Rusiye işğal etken Qırım ile memuriy sıñırda nevbetçilik yapmağa başladı. Göñülliler saylanıp ders alğan edi.

2015 senesi sentâbr ayında Qırımğa aşayt mahsulatı ve mallarını taşığan yük maşinalarını blok etken müddetsiz aktsiyanıñ birinci basamağı başlağan edi. İqtisadiy qamaçav qırımtatar liderleri tarafından teklif etilgen edi. Noyabr ayında onıñ ekinci basamağı başladı – energetik.

2016 senesi yanvar ayında aktsiya formatını deñiştirdi. Faallerniñ bir qısmı ukrain sıñırcılarınen beraber Qırım ile memuriy sıñırda nevbetçilik yapalar. Ekinci qısmı ise Noman Çelebicihan batalyonını qurıp, ileride Qırımnı işğalden azat etilmesinde iştirak etmege qarar aldı.

Qırım 2014 senesiniñ başında Rusiye tarafından işğal etilgen soñ Ukrainanıñ ana qısmı ve yarımada arasında memuriy, lâkin asılında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» kiriş-çıqış kontrol noqtaları çalışmaqta.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG