Link açıqlığı

Rejissör Ahtem Seytablayev Donetsk ava limanını mudafaa etkenlerge bağışlanğan «Kiborgi» filmindeki çekim işlerini yekünlemekte. Bunı filmniñ sanat reberi Şevket Seydametov Qırım.Aqiqatqa bildirdi.

«Şimdi Gonçarovskta (Çernigov vilâyeti – QA) çekimlerniñ soñki saatları. Peskideki bazanı çıqaramız», – dedi o.

Seydametovnıñ qayd etkenine köre, çekimler Kyiv, Çernigov ve Çernigov vilâyetinde keçirildi.

«Kyivdeki pavilyon, Gonçarovsk, poligon ve Çernigovdaki uçaq alanı», – dep qoştı o.

Seytablayev Qırım.Aqiqatqa bergen izaatlarında qayd etti ki, film ukrain devletiniñ meydanğa kelüvine bağışlana ve Donetsk ava limanındaki uruşlarda iştirak etken genç ukrain ve dostlarını añlata.

«Major» tahallüsi olğan baş qaraman zengin bir qorantadan, ATO göñüllisi oldı, bu onıñ ikâyesi ve arqadaşlarınıñ ikâyesidir», – dep ayttı Seytablayev.

Film prodüseri İvanna Dâdüranıñ aytqanına köre, «Kiborgi» filminiñ premyerası 2017 senesi dekabr 6-na planlaştırıla. Onıñ bildirgenine köre, film Devlet kino agentligi bergen devlet büceti ve şahsiy yatırımcılarnıñ parasına çıqarıla.

«Kiborgi» filmi üzerinde iş aqqında 2017 senesi fevral ayında belli oldı.

Ahtem Seytablayev «Başqasınıñ duası» filmi üzerinde işini de devam ete. Onıñ premyerası 2017 senesi mayıs 18-ne planlaştırılğan.

XS
SM
MD
LG