Kreml kontrol etken Qırım mahkemesi «Hizb ut-Tahrir davası» boyunca oturışnı raatlıq kününe belgiledi. Bunı Qırım advokatı Emil Kürbedinov aprel 8-de Facebook saifesinde bildirdi.
«Yarın, aprel 9-da, bazar künü, saat 10-da Kiyev rayon mahkemesinde «Hizb ut-Tahrir davası» boyunca apiske alınğan bağçasaraylılarnıñ apis müddetleri uzatılacaqtır. O qadar insan apiske alına, mahkemeler endi bazar künleri bile çalışmağa mecburlar», – dep yazdı Kürbedinov.
Mart başında Qırımdaki mahkeme Bağçasarayda qırımtatarlarnıñ evlerinde keçirilgen tintüvlerniñ şaatları bergen şikâyet arizalarını red etken edi.
Keçken sene mayıs 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
