Link açıqlığı

Aqmescitteki «terrorizmge qarşı mitingge» 3 biñ insan çıqarıldı – matbuat vastaları


Aqmescitte «Terrorğa qarşı miting», 2017 senesi aprel 8 künü

Aqmescitte aman-aman üç biñge yaqın insan cumaertesi künü «Terrorğa qarşı berabermiz» aktsiyası çerçivesinde mitingge toplaştı. Bunı «RİA Novosti Krım» agentligi bildire.

«Bizge kene bir işaret berile. Utanmaz, arsız, alçaq bir şekilde ve sırtımızğa. Rusiye birligini kene şübege oğratmağa tırışıp, bizni qorquzmağa ve tizimizge qoyacaq olalar. Bunı boşuna yapalar. Onlarnen insannıñ ayatını alğan bugünki facia tek piterlilerni degil, bütün Rusiyeni daa çoq birleştirdi ve pekitti. O birisi kün Vladimir Konstantinov ve Sergey Aksenov yolbaşçılığında Qırım Devlet şurası ve yarımada ükümetiniñ eyyeti Piterde olıp, qırımlılar adından piterlilerniñ qaramanlığı ve cesareti ögünde tiz çökecekler», – dep ayttı mitingde Kreml kontrol etken Qırım parlamentiniñ deputatı Yefim Fiks.

Qırımnıñ Rusiye yolbaşçısı Sergey Aksenov, Facebook saifesinde Sankt-Peterburgdaki patlav – «barışıqsever insanlarğa qarşı yapılğan alçaq ve qorqaq bir darbe», dep yazdı.

Bundan evel Aksenov işğal etilgen yarımadanıñ strategik, infrastruktura ve içtimaiy yerlerinde havfsızlıq tedbirlerini quvetleştirmege emir etip, Qırım Sankt-Peterburg sakinlerine yardım etmege azır olğanını bildirgen edi.

Aprel 3-de kündüz Sankt-Peterburgdaki «Sennaya ploşçad» ve «Tehnologiçeskiy institut» stantsiyaları arasında patlav yüz berdi. İç kimse mesülietni öz boynuna almadı. Rusiye uquq qoruyıcıları onı terakt olaraq tasnif ettiler. Taqiqatçılar daa bir patlayıcı Sankt-Peterburgdaki «Ploşçad Vosstaniya» stantsiyasında tapılğanını ve onı zararsız alğa ketirgenlerini haber ettiler.

Aprel 4-de Rusiye Taqiqat komiteti Peterburg metrosında patlayıcını 22 yaşında Akbarcon Calilov işletti, dep bildirdi. Rusiye taqiqatçıları bu beyanatnı ertesi künü aydınlattı. Sankt-Peterburg metrosında yüz bergen patlav neticesinde 14 insan elâk oldı, 49 kişi yaralandı.

XS
SM
MD
LG