Link açıqlığı

İslâmov: «Asker» mesüliyetli insanlar aşıqmağanından sebep alâ daa Ukraina Silâlı quvetlerine kirmedi


Lenur İslâmov

«Asker» vatandaş birleşmesi «bu qararlarnı alğan bazı arbiyler aşıqmağanından sebep» alâ daa Ukraina arbiy-deñiz quvetleriniñ bölügi olmadı. Bunı Qırımnıñ vatandaş qamaçavı aktsiyasınıñ koordinatorı Lenur İslâmov «Glavkom» neşirine tarif etti.

«Bunıñ kibi qararlarnı qabul etken bazı arbiylerniñ areketsizliginen bağlıdır. Olar bugün de qırımtatarlar aqqında menfiy efsanelerge inanalar», – dep ayttı İslâmov.

Aprel başında İslâmov «Asker» ileride de Qırım ile memuriy sıñırda nevbetçilik yapmalı, dep bildirgen edi.

Qırımtatar halqınıñ lideri Mustafa Cemilevniñ aytqanına köre, «Asker» qırımtatar birleşmesi Ukraina arbiy-deñiz quvetleriniñ deñiz piyade askerleri erkânında bölük olacaq. Böyle bir añlaşma Ukraina mudafaa naziri Stepan Poltorak ile tizilgen edi.

«Mudafaa naziri Poltorak ile añlaşmamız bar, bu deñiz piyade askerleri erkânında bir bölük olacaqtır. Başqa bir şey istegen edik, amma şimdilik bu da yeter. Askerlerniñ sayısını aytmaq zor, 250 insan yazılğan edi. Bu batalyon qanunlaştırılğan soñ çoq insan yazılacaqtır. Ve tek qırımtatarlar degil», – dep ayttı Cemilev.

2017 senesi fevral ayında «Asker» birleşmesiniñ vekilleri ve politsiya arasında zıddiyet yüz bergen edi. Arbiy urbada silâlı insanlar Herson vilâyetindeki Çonğar köyü yanında yerleşken Noman Çelebicihan qırımtatar batalyonınıñ bazasını zapt etti.

Belli bir müddet keçken soñ arbiyler ve politsiya «Asker» birleşmesi ve Noman Çelebicihan qırımtatar batalyonınıñ mevamını terk ettiler.

XS
SM
MD
LG