Rusiye Cenüp arbiy bölgesiniñ mahsus quvetleri taqımı 500 km keçip, Krasnodar ülkesi ve Qırım poligonlarına avuştı.Bunı aprel 8-de Cenüp arbiy bölgesiniñ matbuat hızmeti bildirdi.
«Rostov vilâyetinde başlağan taqım-ştab talimleri çerçivesinde Cenüp arbiy bölgesiniñ mahsus quvetleri talimlerniñ faal qısmına başladı. Mahsus bölük gruppaları farqlı usullar ile, «Tayfun» ve «Tigr» zırhlı maşinaları ve arbiy-naqliyat aviatsiyasınıñ uçaqlarından paraşüt ile enip, Krasnodar ülkesi ve Qırım cumhuriyetiniñ poligonlarına vazifelerini becermek içün avuştırıldı», – dep qayd etti matbuat hızmeti.
Qayd etile ki, talimlerge 450 asker, 100 daneden ziyade mahsus tehnika celp etildi.
Mart 24-de Qırımda Rusiye ava-paraşütçi ordusınıñ üç bölügi ile taqım-ştab talimleri yekünlendi. Olarnı Ava-paraşütçi ordusınıñ komandanı general-polkovnik Andrey Serdükovnıñ reberiyeti altında Opuk poligonında keçirdiler.
Ukraina Baş ştabı Qırımda Rusiye askerleriniñ talimlerini qanunsız dep adlandırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
