Link açıqlığı

«Hizb ut-Tahrir davasınıñ» mabusı Zeytullayev müddetsiz açlıq ilân etti – advokat


Advokat Emil Kurbedinov ve«Hizb ut-Tahrir davasınıñ» mabusı Ruslan Zeytullayev

Rostovdaki apishanede tutılğan Aqyarlı Ruslan Zeytullayev müddetsiz açlıq ilân etti. Bunı Qırım.Aqıqatqa aprel 4 künü qabaatlanğannıñ advokatı Emil Kurbedinov bildirdi.

«Ruslan Zeytullayev bütün mahkeme erkânını davadan çetleştirmege talap etti ve işanmağanını beyan etti. Bu red etildi. Bundan soñ o, Qırımda qırımtatarlarğa basqı yapılğanı, cemaat faalleri taqip etilgeni ve onıñ cinaiy işi açıqtan siyasiy dava olğanı sebebinden, açlıq ilân etti. O bir qaç talabını seslendirdi, olardan biri – oñı Ukraina vatandaşı olaraq, Ukraina (qıta – QA) territoriyasına teslim etilmesi», – dep qoştı Kurbedinov.

O, aprel 4 künü mahkeme toplaşuvında imaye tarafı bir-qaç muracaatta bulunğanını bildirdi.

«Muracatlardan biri – apishanede tutılğan Sayfullayev, Vaitov ve Primov arqadaşlarnı şaat olaraq çağırmaq muracaatı qabul olundı», – dedi Kurbedinov.

Bundan soñ qabaatnıñ temeli olğan ekspertizanı keçirgen ekspertlerni çağırılmaq içün muracaat etildi, qayd etti advokat. Olarnı çağırmağa mahkeme razı olamadı.

Nevbetteki mahkeme toplaşuvı aprel 14 kününe belgilendi.

Rostov-na-Donu şeerindeki Şimal-Kavkaz bölge arbiy mahkemesi, iyün 1-de mahkemeni başlap, sentâbr 7 künü «Hizb ut-Tahrir» ile alâqalarınen qabaatlanğan Qırım musulmanlarınıñ işi boyunca ükmüni çıqardı. Mahkeme qararına binaen, Aqyar sakini Ruslan Zeytullayev «Hizb ut-Tahrir» bölügini teşkil etti dep yedi yılğa, Ferat Sayfullayev, Rustem Vaitov ve Nuri Primov ise beş yılğa qadar apiske alındı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Tışqı işler nazirligi, Rusiye akmiyeti tarafından yapılğan «nevbetteki safsata mahkemesini» takbih etti ve Rusiyeden deral ükümüni lâğu etmesini talap ete.

XS
SM
MD
LG