Aqmescit ava limanında Sankt-Peterburgdaki patlavdan soñ havfsızlıq tedbirleri quvetleştirilgenini haber eteler. Bunı mart 4-de «Simferopol» ava limanınıñ akimiyet organları ile alâqa ve cemaat ile bağ müdiri İgor Laptev «Sputnik v Krımu» radiosına bildirdi.
«Al-azırda ava limanında olğan havfsızlıq tedbirleri qanunğa köre keçirile ve ğayet yüksek sayıla. Faqat Ava naqliyatı federal agentliginiñ bergen avalesine köre havfsızlıq tedbirleri quvetleştirildi», – dep bildirdi Laptev.
Onıñ aytqanına köre, uçaq alanı daa çoq nezaret etile, köpekli bekçiler arttırıldı, terminal kirişlerinde ve ava limanınıñ uçuş evelsi teşkerüv quvetleştirildi.
Sankt-Peterburg metrosında yüz bergen patlav neticesinde eñ az 11 insan elâk oldı. 50 kişi yaralandı. Sankt-Peterburgdaki metro vagonında patlav «Sennaya ploşçad» ve «Tehnologiçeskiy institut» stantsiyaları arasında şeerniñ merkezinde olıp keçti. Patlavdan soñ metro bütünley qapatıldı.
Rusiye Baş prokuraturası patlavnı terrorist ücümi dep adladı, soñra ise patlav sebepleri aqqında aytmaq daa erte, dep qayd etti. Rusiye Taqiqat komiteti cinay iş açtı. Rusiyeniñ terrorizm ile küreş milliy komiteti Sankt-Peterburg metrosınıñ daa bir stantsiyasında patlav maddesi tapılğanını bildirdi, lâkin onı vaqtında telükesiz alğa ketirip oldılar.
