Kreml kontrol etken Qırım Yuqarı mahkemesinde «Çiygoz davasınıñ» 98-inci oturışında imaye şaatı Şevket Kaybullayev yaqalanğan Ahtem Çiygoz 2014 senesi fevral 26-da Qırım Yuqarı Şurasınıñ binası yanında olıp keçken miting vaqtında bir de bir «qanunsız areketler» yapmağanını bildirdi. Bunı advokat Nikolay Polozov Facebook saifesinde yazdı.
«Meclis toplaşuvında (2014 senesi fevral 25 künü – QA) Qırım Yuqarı Şurasınıñ binası yanında Ukraina topraq bütünligine qoltutuv mitingini keçirmek qararı qabul etildi. Meclis kâtibiyetine alınğan qararnı ealige kütleviy haber vastaları üzerinden bildirmege avale etilgen edi. Regional meclislerni haberdar etmek vazifeleri Meclis reisiniñ muavini Zaur Smirnovğa berilgen edi. Şaat, Meclis toplaşuvında olğan Ahtem Çiygozğa birisiniñ tarafından bir de bir vazife berilgenini körmedi», – dep aytıla advokatnıñ haberinde.
Polozovnıñ bildirgenine köre, 2014 senesi fevral 26-da Qırım Yuqarı Şurasınıñ binası yanında şaat Meclisniñ bazı azaları, Zaur Smirnov, Refat Çubarov, Ahtem Çiygoznı körgen edi.
«Olar insanlarnı tınçlandırmağa tırıştılar. Ahtem Çiygoz yaşlı bir erkekni tınçlandıra edi. Şaat olarnıñ aytqanlarını ses-şamata olğanından eşitmedi, amma subet vaqtında olğan mimikağa köre böyle neticege keldi», – dep qayd etti advokat.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
