Freedom House Amerika teşkilâtı eski kommunist memleketlerinde demokratiya vaziyetine dair maruzanı aydınlatıp, Ukrainanıñ deñişmeler ceetinden ilerilegenini qayd etti.
Maruzada qayd etile ki, Merkeziy ve Şarqiy Avropa, Balkanlar ve Avrasiyada avtoritar rejimli memleketler demokratiya olğan memleketlerden daa çoq. Ukraina bu tedqiqatta avtoritar regionnıñ istisnası dep adlandırıldı.
«Tedqiqatımızda kördik ki, Ukraina 2016 senesi ilerilemege devam ete, amma ciddiy kederli alâmetler de bar, eski gvardiya islâatlarnı kene de yeñe bile. Ukraina tarafdarları halqara alanda soñki üç yıl köstergen «sert sevgi» yanaşuvını devam ettirmeli, o, yerli vatandaş cemiyetine qoltuta», – dep qayd etti «Keçici müddetteki memleketler» leyhasınıñ müdiri Neyt Şenkan.
Eski sovet memleketleri arasında yalıñız Ukraina, Moldova, Gürcistan ve Ermenistan avtoritar rejim tilengen memleketler sırasına kirmey. Qırğızistan prezident Almazbek Atambayevniñ siyasetinden sebep avtoritar memleket olaraq tanıldı, amma keçken sene o da Ukraina ile aynı cedvelde olğan edi.
«Keçici müddetteki memleketler» adlı maruza 1995 senesinden itibaren er yıl derc etile. Esabat sabıq Sovetler Birligi, Merkeziy, Şarqiy Avropa ve Balkanlarnıñ 29 eski kommunist memleketini qaplap ala. Maruzada aytılğanı kibi, 2016 senesi Büyük Britaniyanıñ Avropa Birliginden çıqması ve Amerika Qoşma Ştatlarındaki saylavlar demokratiya vaziyetine menfiy tesir etti.
