Link açıqlığı

Canköyde Rusiye FSB sımarışı ile bir qaç çoq qatlı ev qurula


Canköy, Rusiye FSB arbiy qurucılıq FDMM «KAQB» evleriniñ qurucılığı, mart 2017 senesi

Canköyde Rusiye FSB hadimleri ve arbiyler içün bir qaç çoq qatlı ev qurulmaqta. Qurucılar doquz qatlı dört evlerni qurıp çıqtılar, şimdi içte işler yapıla. Bunı mart 31 künü Qırım.Aqıqat muhbiri haber ete.

Qurucılıqnıñ alıp barğan müessise – FDMM «KAQB» ola, bu malümat qurulğan evler yanında olğan yazıda beyan etile.

Açıq menbaalardaki malümatqa köre, bu FDMM Rusiye FSB arbiy-qurucılıq idaresiniñ «Kavkaz arbiy-qurucılıq bölügi» ola.

2017 senesiniñ başında Rusiye FSB sıñır hızmetiniñ başı Vladimir Kulişov 2017 senesi Qırımda Rusiyeli arbiyler içün qoşma 910 daire qurılacaq dep bildirgen edi.

Rusiyeli «Pervıy kanalı» bergen haberine köre, Ermeni Bazar, Canköy, Aqmescit ve Aqyarda Rusiyeli sıñırcılarnıñ aileri içün evler qurula. 2020 senesine qadar ordu hızmetçileri içün «daire meselesini bütünley çezmege» vade eteler.

2016 senesi Aqyar sakinleri Putinge mektüp yazıp, etrafta olğan ekâne yeşil alanda bala meydançığı yerinde Rusiye FSB hadimleri içün ev qurucılığını toqtatılmağa talap ete ediler.

2017 senesi mart ayında Ukraina Yuqarı Radasınıñ reisi Andriy Parubiy Varşavadaki «Ukraina-Poloniya-Litvaniya» parlamentlerara assambleyasınıñ toplaşuvında çıqışta bulunıp bildirdi ki, Rusiye işğal etilgen Qırımda özek silânı yerleştirmek içün arbiy infrastrukturasını azırlay, ayrıca Sovetlerden qalğan özek silâ toldurıcılar tutılğan yerlerni yañıdan tikley ve yañılata, Qırımnı ise «büyük arbiy mekânğa çevire» dep ayttı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG