Ukraina Haber siyaseti nazirligi tarafından taqdim etilgen «Ukrainada Qırım meselesi» soravınıñ netecesine köre, ukrainlerniñ 60% Ukraina qırımtatar medeniyetini desteklemek içün mahsus siyaset alıp barmalı dep saya. Sorav neticeleriniñ kopiyaları Qırım.Aqiqatqa da berildi.
Vesiqada: «Soraştırğanlarnıñ çoqusı qırımtatar sanatı ğayrıdan tiklenilgenini (68%), qırımtatar haber vastalarına yardım berilmesini (66%) ve ukrain tilinde qırımtatar yazıcılarnıñ eserleri neşir etilmesini istey (65%)», – açıqlanıla.
Ondan da ğayrı qayd etile ki, ukrainlerniñ 45% – Qırım işğali ve milliy mesüplikke köre başqalardan neticesinde eñ çoq qırımtatarlar zarar körgenini tüşüne.
Bundan evel haber etilgen edi, ukrainlerniñ 86% işğal olunğan Qırım Ukraina nezaterine qaytqanını istey.
Haber etilgeni kibi, Ukraina Haber siyaseti nazirliginiñ sımarışınen «Ukrainada Qırım meselesi» soravını InMind ögrenüv kompaniyası keçirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
