Link açıqlığı

Kreml nezaretinde çalışqan Aqmescitteki Kiyev rayon mahkemesi faal Bilâl Adilovnı azat etmege qarar aldı, apiske alınması aqqına taqiqatçınıñ muracaatı red etildi. Bunı Qırım.Aqıqatqa bergen izaatında advokat Edem Semedlâyev tarif etti.

Semedlâyev : «Ceza belgilenmesi muracaatı boyunca mahkeme keçti. Taqiqatçı apis cezasını rica ete edi, amma taqiqatçınıñ ketirgen iç bir delili temelsiz olğanı ve kerçek olmağanı sebebinden prokuror bizni destekledi ve muracaatnı red etti. Mahkemeci muracaatnı qabul etmegen soñ Adilovnı azat ettiler», – dep tarif etti.

Bunnen beraber, advokat qayd etti ki, Rusiye Cinayet Kodeksiniñ 318 maddesine köre cinaiy iş açıldı ve bügünki toplaşuvda Adilovğa qabaatnamesi berildi.

Mart 29, çarşenbe künü Kreml kontrol etken Qırım Yuqarı mahkemesiniñ binası yanında maskalı belgisiz şahıslar Belâl Adilovnı tuttı.

Adiseni videoğa çıqarğan şaatnıñ telefonını atıp, Adilovnıñ özüni mikroavtobusqa mindirip alıp kettiler. Keççe malüm oldı ki, yaqalanğan insan Qırımdaki Taqiqat komitetiniñ Rusiye idaresine ketirilgen edi.

Qırımdaki Taqiqat komitetiniñ Rusiye idaresiniñ sitesinde faal yaqalanğanı aqqında haber yoq.

Qırım Rusiye kontroli altına keçken soñ yarımadada FSB jurnalist, advokat, cemaat erbabı ve qırımtatarlarnı sorğuğa çekip, evlerinde tintüvler keçire. Uquq qoruyıcılar bunı «farqlı fikir yürsetmekke küreş» olaraq tanıy.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı kösterilmesini toqtatmağa çağırdı.

XS
SM
MD
LG