Link açıqlığı

İşğal olunğan Qırımda qırımtatar maarifçisi İsmail Gasprinskiy adına medal çıqaracaq olalar. Bunı Facebookta Rusiye devlet dumasınıñ deputatı Ruslan Balbek haber ete.

«Aqmescitteki Tavrida Merkeziy muzeyiniñ geraldik komissiyasınıñ oturuşında İsmail Galsprinskiy adına medalniñ eki çeşiti teklif etildi. Men internatsional variantını destekliyim: İsmal Gasprinskiy alçaq göñüllü ve bunnen beraber – büyük edi. Onıñ içün, fikirimce, ödül altın olmamalı, kümüş te asıl maden. Ümüt etem, aprelde birinci medallerni özümiz körermiz», – yazdı o.

Kreml nezaretindeki Qırım Devlet Şurasında, eskiz prezidium tarafından tasdiqlanmadı ve medal tam ne zaman azır olacağı belli degil, dep qayd eteler.

Qırım Devlet Şurasınıñ vesiqasında «Gasprinskiy adına medal – Qırım Cumhuriyetindeki halqlarnıñ medeniy ve ruhıy inkişafına, Qırım Cumhuriyeti menfaatı içün ananeviy din yöñelişleriniñ qaviyleymesine, Qırımda halqlar ve mezepler ara mabetlik ve añlayışına büyük isse qoşqan şahısqa berilecek Qırım Cumhuriyetiniñ devlet ödüli», – dep yazılğan.

İsmail Gasprinskiy (1851-7914) – qırımtatar mütefekkiri, maarifçi, neşirci ve siyasetçi olıp, ceditçilik ve türkçilik areketleriniñ tesisçilerinden biri. Gasprinskiyniñ dünyaviy ümdeleri ve ğayeleri liberal mefküre, cemiyetniñ teraqqiy inkişafı, slav ve türk halqlarnıñ dostluğı, hristian ve musulmanlarnıñ tolerans davranışı, sotsialistlerniñ radikal talaplarını red etmekte esaslana edi.

XS
SM
MD
LG