Link açıqlığı

Qırımda mart 30-da mahkeme oturışında Aqmescitte uquq qoruyıcılar tarafından yaqalanğan faal Belâl Adilovğa nisbeten alınacaq tedbirler belgilenecektir. Bunı advokat Edem Semedlâyev aydınlattı.

«10 saat devamında müşterim Kiyev rayonınıñ Taqiqat komitetinde bulundı. Soñra vaqtınca tutuv izolâtorına yolladılar, 91-inci maddege köre yaqalav protokolı tizildi, mart 30-da alınacaq tedbirlerni belgileycek mahkeme olacaqtır», – dep tarif etti Semedlâyev Facebooktaki «KrımSOS» cemaat teşebbüsiniñ saifesinde derc etilgen videoda.

Advokatnıñ aytqanına köre, Adilovnı Bavurçıda (Kamenkada) olğan tintüvler vaqtında politsiya hadimleriniñ qorantalarını qorqutqanınen qabaatlaylar.

Qırımda Belâl Adilovnıñ qaçırılmasını körgen Rustem Muyedinov bildirdi ki, politsiyanıñ Jeleznodorojnıy rayon bölüginde insan qaçırılğanına dair arizasını qabul etmek yerine onı sorğuğa çektiler.

Çarşenbe künü, mart 29-da, Kreml kontrol etken Qırım Yuqarı şurasınıñ binası ögünde belgisiz maskalı insanlar Belâl Adilovnı yaqaladı.

Adiseni videoğa çıqarğan şaatnıñ telefonını atıp, Adilovnıñ özüni mikroavtobusqa mindirip alıp kettiler. Soñki malümatlarğa köre, yaqalanğan insan Qırımdaki Taqiqat komitetiniñ Rusiye idaresinde buluna.

Advokat Emil Kürbedinovnıñ bildirgenine köre, Adilov Rusiye Ceza kodeksiniñ 318-inci maddesi boyunca qabaatlana – akimiyet vekiline qarşı zorbalıq ya da telüke qullanması.

Qırım Rusiye kontroli altına keçken soñ yarımadada FSB jurnalist, advokat, cemaat erbabı ve qırımtatarlarnı sorğuğa çekip, evlerinde tintüvler keçire.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı kösterilmesini toqtatmağa çağırdı.

XS
SM
MD
LG