Link açıqlığı

Qırımda Adilovnıñ yaqalanğanını körgen şaat qaçıruv aqqında haber etkende sorğuğa çekildi


Örnek resim

Qırımda Belâl Adilovnıñ qaçırılmasını körgen Rustem Muyedinov bildirdi ki, politsiyanıñ Jeleznodorojnıy rayon bölüginde insan qaçırılğanına dair arizasını qabul etmek yerine onı sorğuğa çektiler. Bunı Adilov mart 29-da Qırım.Aqiqatqa bildirdi.

«Bir qaç insan Jeleznodorojnıy rayon bölügine barıp, olğanlarnı añlatacaq edik. Anda kelgende dediler ki: bir kişi kirip ariza yazsın. Odada maña sualler berilmege başladı, olıp keçken adisenen iç bir alâqaları yoq edi, aksine, anda ne içün kelgenimizni soramağa başladılar. Şahsiy malümatlarım alındı: qaydan olam, qayda yaşayım, qaç yaşındam, qayda çalışam. Olarnıñ aytqanına köre, bu «levhanı toldurmaq» içün yapıldı. Yaqalav aqqında bir-eki söz yazdılar», – dedi Muyedinov.

Muyedinovnıñ aytqanına köre, rayon bölüginde parmaq izlerini alacaq ve telefondaki nomeralarnı yazıp alacaq ediler.

«Telefonımdaki nomeralarnı yazıp alacaq ediler. Nege kerek sualime tam bir cevap berilmedi. Qoşma malümat alacaq ekenler. Men uquqçınen bağlandım, qanunğa uyamı-yoqmı soradım. Uquqçı böyle bir aqları olmağanını ayttı. Men razı olmadım, olar ise parmaq izlerimni ve tükürçigimni alacaq insannı çağırdılar. Men buña razılıq bermedim», – dep ayttı o.

Qaçıruv şaatı sorğu vaqtında Adilov oña telefon etip olğan yerini bildirdi, dep qoştı. Bundan soñ Muyedinov yaqalanmağanını tasdıqlap binanı terk etti.

Çarşenbe künü, mart 29-da, Kreml kontrol etken Qırım Yuqarı şurasınıñ binası ögünde belgisiz maskalı insanlar Belâl Adilovnı yaqaladı.

Adiseni videoğa çıqarğan şaatnıñ telefonını atıp, Adilovnıñ özüni mikroavtobusqa mindirip alıp kettiler. Soñki malümatlarğa köre, yaqalanğan insan Qırımdaki Taqiqat komitetiniñ Rusiye idaresinde buluna. Advokat Emil Kürbedinovnıñ bildirgenine köre, Adilov Rusiye Ceza kodeksiniñ 318-inci maddesi boyunca qabaatlana – akimiyet vekiline qarşı zorbalıq ya da telüke qullanması.

Qırım Rusiye kontroli altına keçken soñ yarımadada FSB jurnalist, advokat, cemaat erbabı ve qırımtatarlarnı sorğuğa çekip, evlerinde tintüvler keçire.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı kösterilmesini toqtatmağa çağırdı.


XS
SM
MD
LG