Kreml kontrol etken Qırım Yuqarı mahkemesi mart 29-da Qırımtatar Milliy Meclisiniñ reis muavini Ahtem Çiygoznıñ davası boyunca oturışında imayeniñ eki şaatını sorğuğa çekti. Olar onıñ qabaatını tasdıqlamadı. Bunı Çiygoznıñ advokatı Nikolay Polozov Qırım.Aqiqatqa bildirdi.
Polozovnıñ aytqanına köre, bugünki oturışta imaye Çiygoznıñ qabaatsız olğanını isbatlağan delillerni köstermege devam etti, ve Rustem Ennanov ve Ridvan Selimov sorğuğa çekilgen ediler.
«Ennanovnı aytsaq, anda (Qırım Yuqarı Şurasınıñ binası ögünde – QA) tahminen saat 11-lerde olğanını bildirdi. Ukrainağa qoltutqan miting iştirakçileriniñ olğan yerini, anda Rusiyege qoltutqanlarnı, olarnıñ mitingi bam-başqa saatta olacağına baqmadan, körgenini añlattı. Çubarov ve Aksönov, em de Ahtem Çiygoznı körgen edi. Faqat onı körgende o bir de bir zorbalıq areketlerini yapmadı, işaret köstermedi ve emirler bermedi», – dep ayttı advokat.
Polozov dedi ki, şaat gizli şaatlarnıñ malümatlarını red etken ifade berdi. Gizli şaatlar fevral 26-da olacaq miting haberini Çiygoz bildirmek kerek edi, dep aytqan ediler.
Ekinci şaat Ridvan Selimov, Polozovnıñ aytqanına köre, Rusiye mahkemesini Çiygoz miting iştirakçilerini tınçlandırğanında işandırmağa tırıştı.
«Miting aqqında 25-de ATR telekanalında eşitkenini bildirdi. 26-da saba saat 10-larda mitingge keldi. Çiygoznı kördi. Rusiyege qoltutqan miting iştirakçileriniñ provokatsiyalarına açuvlanğan gençlerni tınçlandırğanını kördi. Toplaşqanlar bir de bir zorbalıq yapmaycaq, binanı zapt etmeycek edi, dep qoştı. Olar bir maqsatnen kelgenler: Ukraina topraq bütünligine qoltutqanlarını bildirmek», – dep ayttı o.
«Çiygoz davasınıñ» nevbetteki oturışı cumaaqşamı künü, mart 30-da, olacaqtır.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
