Link açıqlığı

Saatnıñ esas haberi

 «Hizb ut-Tahrir davasınıñ» mabusları insanlıqtan tış şaraitte bulunalar – Cemadenov


«Hizb ut-Tahrir davasınıñ» mabuslarından biri Emil Cemadenov, işğal olunğan Aqmescitniñ mahkemesinde nevbetteki toplaşuv devamında yaqalanğanlarnıñ episi insanlıqtan tış şaraitte bulunğanıñı ayttı, şimdiki akimiyetiniñ qabaatları ise «Qırım musulmanlarını yamanlamaq» içün qullanılğanını beyan etti. Bunı Qırım.Aqıqat muhbiri bildire.

Qabaatlağan taraf ise mabuslarnı, olar «cinayetler işlemege devam etmek mümkünler» dep, apisten çıqarmağa mümkün olmağanını ayttı. Yaqalanğanar buna cevap olaraq, bir qaç kere qayd ettiler ki, olarğa atılğan qabaat olarnı aqaretley, olar cinayet işlemege devam etecekler demek içün taqiqatnıñ sebebi yoq, taqiqat özü ise alıp barılmay. Ayrıca, Uzair Abdullayev apiste bulunğan bütün beş ay devamında tek bir kere taqiqatçını körgenini qayd etti.

Bundan evel haber etilgeni kibi, Kreml nezaretindeki Qırımnıñ Yuqarı mahkemesi «Hizb ut-Tahrir davasınıñ» beş mabusınıñ apis cezası uzatılmasına qarşı şikâyet arizalarını red etti.

Kreml kontrol etken Aqmescit Kiyev rayon mahkemesi mart 7-de «Hizb ut-Tahrir davasınıñ» beş mabusı Emil Cemadenov, Üzeir Abdullayev, Teymur Abdullayev, Ayder Saledinov ve Rustem İsmailovnıñ apis müddetini uzattı. Olar 2017 senesi iyün 11-ne qadar apiste qalacaqlar.

Oktâbr 12 künü Qırımda beş musulman ailesiniñ evinde tintüvler keçirilgen edi. Böylece, beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlandı: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG