Link açıqlığı

Saatnıñ esas haberi

Qırımdaki mahkeme «Hizb ut-Tahrir davasınıñ» mabuslarınıñ apis cezası uzatılmasına qararını denişmey qaldırdı


Qırım Yuqarı mahkemesi
Qırım Yuqarı mahkemesi

Mart 29 künü Kreml nezaret etken işğal olunğan Qırımnıñ Yuqarı mahkemesi «Hizb ut-Tahrir davasınıñ» beş mabusı içün apis cezasınıñ uzatılmasına qarşı şikâyet arizalarını red etti. Bunı Qırım.Aqıqatqa bergen izaatında Qırımlı advokat Oksana Jeleznâk bildirdi.

«Mahkeme qararını denişmesiz qaldırdılar», – haber etti Jeleznâk.

Mart 27 bazarertesi künü Kreml nezaret etken işğal olunğan Qırımnıñ Yuqarı mahkemesi Aqmescitli «Hizb ut-Tahrir davasınıñ» beş mabusınıñ mahkeme toplaşuvını başqa künge keçirdi. Bu toplaşuvda «Aqmescitli beşniñ» apis müddeti uzatılmasına qarşı şikâyetler baqılacaq edi. Ancaq qabaatlanğanlar ve imayecilerniñ episi şikâyet arizalarınıñ kopiyalarını vaqıtında almağan edi. Bunı mahkeme toplaşuvından soñ advokat Emil Kurbedinov tarif etti.

Mart 24 künü Kreml nezaret etken işğal olunğan Qırımnıñ Yuqarı mahkemesi «Hizb ut-Tahrir davasınıñ» beş mabusınıñ mahkeme toplaşuvını, Teymur Abdullayev ve Rustem İsmailovnıñ imayecileri olmağanı sebebinden başqa künge qaldırdı.

Mart 7 künü Kreml nezaret etken Aqmescitteki Kiyev rayon mahkemesinde «Hizb ut-Tahrir davasınıñ» beş mabusı Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovke apis cezasını arttırmağa qarar alındı. Apis cezası 2017 senesi iyün 11 kününe qadar uzatıldı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG