Link açıqlığı

«Hizb ut-Tahrir işiniñ» Yaltalı mabusı Emir-Usein Kukunıñ imayesine taqiqat vesiqalarını fotoresimge çıqarmağa yasaq ettiler – advokat


Mart 29 künü Kreml nezaretindeki Aqmescitniñ Kiyev rayon mahkemesinde «Hizb ut-Tahrir işiniñ» Yaltalı mabusı Emir-Usein Kukunıñ qoruyıcısına taqiqat vesiqalarını fotoresimge çıqarmağa yasaq ettiler. Bunı mahkeme toplaşuvından soñ mabusnıñ advokatı Aleksey Ladin bildirdi.

«Yazıq ki, bu beklenilgen qarar edi. Şikâyetimizni red ettiler. Yani, imayeniñ tanış olmağa aqqı olğan vesiqalarınen foto-resim çıqarma usulı ile talil etmege yasaq etildi. Yani ekspertiza yapılmasına qararnen ve ekspertlerniñ hulâsalarınen. Mahkemeniñ qararı, taqiqat sırları aşkâr olmaq mümkün sebebinen añlatıldı. Ne içün qolnen köçirip yazmağa, köçirip bastırmağa mümkün de, foto-resim çıqarmağa yasaq – menim içün büyük sır», – dedi Ladin.

Onıñ sözlerine köre, Rusiye mahemelerinde böyle sualler qabaatlanğanlar ve olarnıñ qoruyıcıları tarafına çezile. Advokat, Qırımdaki mahkemeniñ bu qararına şikâyet etecek ola.

«Qırım Yuqarı mahkeesi ne decek, baqayıq. Kerek olsa, şikâyetimizni Rusiye Federatsiyasınıñ Aliy mahkemesine berecemiz», – dep qoştı advokat.

Ondan ğayrı, faaler Emir-Usein Kukunı mahkeme salonından bekçiler alıp ketkenlerini köstergen videonı yayınladılar.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG